प्रीती झिंटाचा शहीदांच्या कुटुंबियांना मदतीचा हात, ऑपरेशन सिंदूरनंतर केलंय हे काम
                प्रीती झिंटाने 'ऑपरेशन सिंदूर'नतर भारतीय सैन्यातील शहीद जवानांच्या कुटुंबियांना आर्थिक मदत केली आहे. पंजाब किंग्सच्या सीएसआर फंडमधली काही रक्कम तिने दान केली आहे.
अभिनेत्री प्रीती झिंटा ही आयपीएलची क्रिकेट टीम पंजाब किंग्सची मालकीण आहे. सध्या तिच्या टीमच्या अनेक सामन्यांच्या वेळी ती स्टेडियममध्ये उपस्थित असते. पंजाब किंग्सची मालकीण असलेल्या प्रीतीने एक मोठं पाऊल उचललं आहे. 'ऑपरेशन सिंदूर' नंतर शहीद जवानांच्या पत्नी आणि मुलांसाठी तिने एक कोटींपेक्षा जास्त रक्कम दान केली आहे. 
प्रीती झिंटाचे आर्मी वाइव्स वेल्फेअर असोसिएशनला 1.10 कोटींचे दान
प्रीती झिंटाने आर्मी वाइव्स वेल्फेअर असोसिएशनला (AWWA) 1.10 कोटी रुपये दान केले आहेत. मिळालेल्या माहितीनुसार, पंजाब किंग्सच्या सीएसआर फंडच्या रकमेतला तिचा हिस्सा तिने दान केला आहे. जयपूरच्या एका कार्यक्रमात तिने सैनिकांबद्दलचे आपले विचार मांडले आणि असोसिएशनला आर्थिक मदत केली.
जयपूरमधल्या कार्यक्रमात प्रीती म्हणाली की," शहीद जवानांच्या पत्नींना पाठबळ मिळावं आणि त्यांच्या मुलांना चांगलं शिक्षण मिळावं, या हेतूने मी ही मदत केली आहे. देशासाठी लढणाऱ्या सशस्त्र दलातील सैनिकांच्या कुटुंबियांचा सन्मान करणं आणि त्यांना जमेल तशी मदत करणं ही आपली जबाबदारी आहे. सैनिकांच्या बलिदानाची भरपाई करता येणं, शक्य नाही. पण आपण त्यांच्या कुटुंबाच्या पाठिशी उभं राहू शकतो. त्यांच्या आयुष्यातल्या पुढच्या गोष्टी सोप्या व्हाव्यात, यासाठी प्रयत्न करु शकतो."
ती पुढे म्हणाली की, "भारतातल्या सशस्त्र दलांचा खूप अभिमान वाटतो. देशाच्या सुरक्षेसाठी ते इतकी मेहनत घेतायत तर आपण त्यांना पाठिंबा द्यायला हवा." प्रीती झिंटाने केलेल्या या सामाजिक कार्यामुळे सध्या तिचं खूप कौतुक होत आहे. इतर कलाकारांनीही प्रीती झिंटाचा आदर्श घ्यायला हवा, असं नेटकऱ्यांचं म्हणणं आहे.