कतरिना कैफ बनली मालदीवची जागतिक पर्यटन राजदूत – भारतीय पर्यटकांना आकर्षित करण्याचा प्रयत्न

मुंबई : बॉलिवूड अभिनेत्री कत्रिना कैफ हिची मालदीवच्या पर्यटन मंत्रालयाने जागतिक पर्यटन राजदूत म्हणून निवड केली आहे. ही नियुक्ती भारत आणि इतर देशांतील पर्यटकांना मालदीवच्या नैसर्गिक सौंदर्याचा, संस्कृतीचा आणि पर्यटन संधींचा अनुभव घेण्यासाठी प्रेरित करण्यासाठी करण्यात आली आहे.

मालदीव हे जगभरातील प्रवाशांसाठी एक प्रसिद्ध पर्यटन स्थळ असून निळ्याशार समुद्रकिनारे, आलिशान रिसॉर्ट्स आणि समुद्राखालचं अनोखं जीवन यासाठी ओळखलं जातं. भारत हा मालदीवसाठी एक महत्त्वाचा पर्यटक पुरवठादार देश असून, अनेक भारतीय सेलिब्रिटींनी देखील मालदीवमधील पर्यटन स्थळांना भेट दिली आहे.

कतरिना कैफच्या लोकप्रियतेचा उपयोग करून मालदीव पर्यटन विभाग भारतातील युवा वर्ग व मध्यमवर्गीय पर्यटकांमध्ये जागरूकता वाढवण्याचा प्रयत्न करत आहे. कतरिना कैफनेही सोशल मीडियावरून मालदीवच्या सौंदर्याचे कौतुक करत विविध फोटो आणि व्हिडिओ शेअर केले आहेत, ज्यामुळे तिचे चाहते अधिक प्रमाणात मालदीवकडे आकर्षित होत आहेत.

मालदीव पर्यटन विभागाच्या अधिकाऱ्यांनी सांगितले की, "कतरिना कैफ ही एक आंतरराष्ट्रीय स्तरावर ओळखली जाणारी अभिनेत्री आहे. तिच्या माध्यमातून आम्ही भारतातील आणि इतर देशांतील पर्यटकांपर्यंत पोहोचण्याचा प्रयत्न करत आहोत."

ही मोहिम पर्यटनाला चालना देण्याबरोबरच मालदीव आणि भारत यांच्यातील पर्यटन व सांस्कृतिक संबंध अधिक दृढ करण्यास मदत करेल, असा विश्वास व्यक्त केला जात आहे.